Am Social Media Conference Cymru

Beth yw Social Media Conference Cymru?

Mae Social Media Conference Cymru yn ddigwyddiad sy’n canolbwyntio ar ddod â gweithwyr proffesiynol sy’n ymwneud â’r cyfryngau cymdeithasol at ei gilydd am ddiwrnod o sgyrsiau, trafodaethau a sesiynau cwestiwn ac ateb gan arweinwyr ym meysydd marchnata, y cyfryngau a chyfathrebu.

Gair gan y trefnwyr

Fel unigolion yn gweithio yn y byd marchnata digidol a chyfryngau cymdeithasol ers bron i ddegawd, fe welson ni'r angen am ddigwyddiad proffesiynol gyda gogwydd Gymreig ar gyfer y maes yng Nghymru.

Mae'r cyfleoedd i ddatblygu'n broffesiynol, i ddysgu ac i rwydweithio gyda chyfoedion yn y maes hwn yn brin iawn yng Nghymru, gyda llawer o'r digwyddiadau mawr yn digwydd tu hwnt i Glawdd Offa. Felly dyma newid hynny nawr!

Mae'r maes creadigol yng Nghymru yn ffynnu, ac mae croeso cynnes i chi yn Social Media Conference Cymru.

Alun Jones (chwith) ac Elan Iâl (dde) - cyd-berchnogion cwmni creadigol Libera, a threfnwyr Social Media Conference Cymru.

Beth i'w ddisgwyl?

Mae Social Media Conference Cymru yn dod ag unigolion a chwmnïau ar draws Cymru ynghyd am wledd o amrywiaeth sy'n cynnwys cyflwyniadau, trafodaethau panel a sesiynau cwestiwn ac ateb.

Byddwch yn clywed gan siaradwyr trawiadol, pob un â'u persbectif a'u profiadau unigryw eu hun yn y byd cyfryngau cymdeithasol. Byddwch yn cael gofyn cwestiynau i'r arbenigwyr mewn sesiynau holi ac ateb a phaneli. Bydd digon o amser hefyd i sgwrsio a chysylltu â'r gymuned yn ystod brecwast, cinio ac egwyl.

Y dyfodol

2023 oedd blwyddyn gyntaf Social Media Conference Cymru, gyda 280 ohonoch yn dod ynghyd yng Nghaerdydd i'r gynhadledd gyntaf un. Erbyn 2024 daeth dros 330 ohonoch i Arena Abertawe am ddiwrnod o sgyrsiau a chyflwyniadau difyr.

Ein gweledigaeth yw i ddod yn ddigwyddiad parhaus yn y calendr bob blwyddyn, i ysbrydoli a chefnogi'r meysydd creadigol, marchnata a chyfryngau yng Nghymru am flynyddoedd i ddod.

Page updated

Google Sites

Report abuse